THE BRAES O' BALQUHIDDER

Words: Robert Tannahill (1774-1810) of Paisley, 
   in R. A. Smith, "Scottish Minstrel" (1821)
Tune: HIGHLANDS OF HEAVEN (Sacred Harp, p. 175)
Note: This song should not be confused with an adaptation
      of the fourth verse, known as "Will ye go, lassie, go"
      or "Wild Mountain Thyme," by Belfast singer Francis
      McPeake, now popular in folk music circles.

  Let us go, lassie, go
 Tae the braes o' Balquhidder
  Whar the blaeberries grow
 'Mang the bonnie Hielan' heather
  Whar the deer and the rae
 Lichtly bounding tegither
  Sport the lang simmer day
 On the braes o' Balquhidder

  I will twin thee a bow'r
 By the clear siller fountain
  And I'll cover it o'er
 Wi' the flooers o' the mountain
  I will range through the wilds
 And the deep glens sae dreary
  And return wi' their spoils
 Tae the bow'r o' my dearie

  When the rude wintry win'
 Idly raves roun' oor dwellin'
  And the roar o' the linn
 On the nicht breeze is swellin'
  So merrily we'll sing
 As the storm rattles o'er us
  Till the dear shielin' ring
 Wi' the licht liltin' chorus

  Noo the simmer's in prime
 Wi' the flooers richly bloomin'
  Wi' the wild mountain thyme
 A' the moorlan's perfumin'
  Tae oor dear native scenes
 Let us journey tegither
  Whar glad innocence reigns
 'Mang the braes o' Balquhidder